Pawltlak thla ni 19, 2023 zan khan PHE Department leh Central YMA ṭangkawp chuan rampum huap faina lama hma la ṭhate chawimawina hun, ‘Faina Thlentute Ni’ a hmang a, PHE Department Minister, Prof. Lalnilawma chuan khuallian niin hun a hmanpui.
He hun hi PHE Department Secretary Er. C. Lalremsiama chuan kaihruaiin, sawrkar hnathawk lian hrang hrang bakah khawpui chhung Branch YMA hruaitute leh zirna in lama hotu ṭhenkhatte chuan an hmanpuia, he hunah hian ramchhung hmun hrang hrang aṭanga thlankhawm mi 46 te chu chawimawina pek niin, heng mite hi, phut let nei lo leh mahni ṭhahnem ngaihna vanga khawchhung leh veng faina atana hma la ṭhinte an ni. Hun hmanpuitu khuallian Prof. Lalnilawma chuan “Kan ram fai tur hian Sawrkar hmalakna Programme hrang hrangte duan a lo ni tawh thin a, hei hian nasa takin hma min sawn tir mai bakah, sawrkar, khawtlang hruaitute leh mimal thahnem ngaite ṭanrualna vang a ni, PHE Department leh Central YMA tawngkawpin a lo rel angin zaninah hian chung mite pual liau liauin he programme hi buatsaih a ni a, ram leh hnam hmasawn tur chuan a chhunga cheng mipuite zawng zawng hi kan pawimawh a, kan theihna zawnah ṭheuh ṭhahnem ngaihna nen theihtawp kan chhuah hian rahbi thar kan kai thin avangin zanin programme pawh hi kan ṭhangtharte pawn lo entawn a, he kan mawhphurhna pawimawh tak hi tih chhunzawm ve zel thei turin fuihna a lo ni ka beisei” tiin a sawi.
Faina Thlentute Ni hi kumin kumtir Pawlkut thla ni 27 (zirtawpni) khan PHED leh CYMA Coordination Committee chuan hman a rel a, thlanchhuah hna hi ram pumpui hrut chhuaka puanzarna neih niin, a dap chhuah hna pawh Central YMA kaltlangin branch hrang hrangah neih niin. Tlawmngai pawl dang YLA, MTP leh YCA-te chuan anmahni Branch ṭheuhah an lo kalpui ve bawk a ni. He hun hi Khuangchawi thla ni 12, 2023 (Ningani) khan hman tura ruahmanna kalpui a ni a, amaherawhchu inthlan a awm dawn vangin, election model code of conduct hrenna hnuaiah kalpui tlang theih a ni ta lova, hun ruat dang, nizan khan hman tura ruahmanna kaltlangpui a ni ta a ni. Faina Thlentute hian chawimawina thuziak bakah sum fai, memento, thangchhuah diar leh puan cheite an dawng a, CYMA leh PHED CorCom chuan he hun hmang hian faina lamah mipuite kaihharha an awm chu an tum ber a nih thu an sawi.
He hun hi Zonet leh LPS lamah live a programme tihchhuah a ni a, Central YMA Vice President Prof. Lalnuntluanga chuan YMA aiawha thusawiin, hun tawp kharna, Er. Lalrothanga, Chairman, PHED & CYMA CorCom a nei bawka, zaithiam lar hrang hrangin zaiin kalkhawmte bawk a ni.
