15th September, 2023
Tukin dar 7:00 am khan Project Management Unit, PHE Department bultumin Swachhata Hi Seva (Faina Beihpui thlak) 2023 chu hawnna hun Vanapa Hall kawt-ah hman a ni a, PHE Department Secretary Er. C.Lalremsiama’n hawnna neiin, kawngzawh a vailiam nghal a, hawnna programme hi Project Management Unit (PHED) Director Er. H.Duhkima’n kaihruaiin, PHE Department thawktute leh sawm bikte’n kawng hi an zawh a ni.
Swachhata Hi Seva hi kumtin September ni 15 aṭanga October ni 2 chhungin thupui hran neiin rampum huapa hman ṭhin a ni a, kumin hian ‘Garbage Free India’ tih chu thupuiah hman niin, he thupuiah hian Open Defecation Free (Pawn lera inthiar awm lohna) vawn nun bakah ṭawih theilo bawlhhlawh umbo dan tur kawng hrang hranga in zirtirna te kalpui tum a ni.
He beihpui thlakna hnuaia hmalakna an neih dan tur hmachhawp zingah khawchhung hmuh theiha fai taka siamte, khaw chhung bawlhhlawh ṭawphnawk thenfaite, bawlhhlawh ṭawihthei leh thei lo thliar hran inzirtirte, bawlhhlawh ṭawihthei lo sawngbawl inzirtirna te, bawlhhlawh ṭawihthei lo khawnkhawmte, kan tui tlan hnar leh a vel bawlhhlawh laka fihlim tura inzirtir leh a hna siamtu a bulhnaia thingphunte, hman khat daih plastic in harsatna min thlen dan bakah hmang lo tura mipuite intiamkamna neih puite leh pawn lera inthiar awm tawh lohna tura khawtin a VC te zawng zawng thawhpuite a ni.
Hemi hun chhung hian ramchhung hmun khaw hrang hrangah kumina thupui hmang hian a tam thei ang ber inzirtirna leh hnatlang neih tum a ni.
